Aprètzios

Non b'est petzi s'emergèntzia sirbones, in Sardigna.
Àteras genias de animales sunt contribuende a sa derrota de s'isvilupu.
Sunt creschende e perpetuende·si cun unu ritmu chi ghetat umbra e ponet a beru a tìmere. 
Sunt una piaga, unu disacatu, unu terrore pro totu sas colturas e fintzas pro sa cultura de s'ìsula nostra. Feras famidas chi si sunt corpadas no intre issas ebbia ma finas cun àteras bèstias. Erribios de aterue, de orìgine diferente, ma de sa matessi natura e istripile distruidores, gasi faghende·si prus malas e làmbidas. Si paschent cale si siat tanca. Si nche suspint cale si siat riu. Brutant e istallant in totue. Bi reventint a nche brincare cale si siat mureddu e reticuladu, cresura o làcana. Reales o metafòricos. Non b'at ostàculu chi los arresset, non b'at padente chi no illùdrient. Non b'at cuneta chi los ispantet. Non b'at benidore chi los assustet. E non b'at rispetu chi non disonorent.
E galu non b'at remèdiu, a dolu mannu. Non b'at pratera peruna o esca pro lis firmare su caminu distruidore. Non b'at lege umana o de natura chi los pòngiat in anneu o chi lis catzet su fàmene illacanadu.
Òmines sunt. Homo sapiens. Una ratza mala.